ឧសភា 14 2020
READ 00:00:46
ការផ្តល់ដំបូន្មានសម្រាប់ការប្រាស្រ័យទាក់ទង និងតុល្យភាពជីវិតការងារ
ប្រើបច្ចេកវិទ្យាដើម្បីពង្រឹងការភ្ជាប់ទំនាក់ទំនងជាមួយភ្ញៀវ
ខ្ញុំបាននាំភ្ញៀវមួយក្រុមមក ហើយបានសុំឲ្យពួកគេត្រួតពិនិត្យសេវារបស់យើង ដំណើរការរបស់យើង និងអ្វីៗផ្សេងទៀត។ រឿងមួយដែលពួកគេចង់បានគឺការប្រាស្រ័យទាក់ទងកាន់តែច្រើនពីយើង។ អញ្ចឹង ខ្ញុំក៏ប្រើបច្ចេកវិទ្យាជាវិធីមួយដើម្បីទាក់ទងពួកគេឲ្យបានទៀងទាត់ តាមរយៈការផ្ញើចេញនូវអ៊ីមែលវីដេអូ ព្រមទាំងអ៊ីមែលលិខិតដំណឹងជាប្រចាំ។ វាពិតជារឿងសប្បាយរីករាយមួយក្នុងការផ្ដល់ជូនពួកគេនូវព័ត៌មានជាច្រើនអំពីអ្វីដែលកំពុងកើតឡើងក្នុងក្រុមហ៊ុនរបស់យើង។
អ្វីដែលពិតជាគួរឲ្យចងចាំនោះគឺមតិតបដែលខ្ញុំទទួលបានពីភ្ញៀវរបស់ខ្ញុំ។ ពួកគេស្គាល់យើងកាន់តែច្បាស់ ដោយសារយើងធ្វើការប្រាស្រ័យទាក់ទងកាន់តែច្រើន ហើយវាជំរុញឲ្យមានសន្ទនានិងការណែនាំកាន់តែច្រើនដែរ។ ការអនុវត្តបច្ចេកវិទ្យាដែលយើងកំពុងប្រើបានផ្ដល់រង្វាន់បន្ថែមដល់យើងក្នុងការបង្កើនភាពទំនាក់ទំនងជាមួយភ្ញៀវទាំងនោះ។
ឧទាហរណ៍មួយគឺអំពីការផ្ទេរគំនរទិន្នន័យ Equifax និងការលួចទិន្នន័យផ្ទាល់ខ្លួនក្នុងពេលថ្មីៗនេះ។ សឹងតែភ្លាមៗ យើងអាចផ្ញើអ៊ីមែលមួយចេញ។ យើងបានធ្វើអ៊ីមែលវីដេអូមួយដែលអប់រំភ្ញៀវរបស់យើងអំពីអ្វីដែលត្រូវធ្វើ ជាមួយនឹងតំណទៅកាន់ធនធានជាច្រើន ដើម្បីជួយពួកគេឲ្យទទួលព័ត៌មានបន្ថែម។ ខ្ញុំបានទទួលការហៅទូរសព្ទជាច្រើនពីភ្ញៀវបន្ទាប់ពីនោះ ពីរឿងថាតើពួកគេពិតជាស្ងើចសរសើរយ៉ាងម៉េចពីការផ្តល់សេវានោះ។
ឧទាហរណ៍មួយទៀតគឺការចែករំលែកជោគជ័យរបស់យើងពីអ្វីដែលកំពុងកើតឡើងក្នុងការិយាល័យរបស់យើង។ នៅដើមឆ្នាំ យើងបានដាក់ចេញនូវការកំណត់គោលបំណងផ្ទាល់ខ្លួន ហើយបុគ្គលិកទាំងអស់បានចូលរួមក្នុងការប្រជែងសម្រកទម្ងន់ក្នុងពេលប្រាំមួយខែដំបូង។ យើងបានប្រកាសអ្នកឈ្នះជាមួយរូបភាពមុននិងក្រោយ ព្រមទាំងផ្ញើព័ត៌មាននោះចេញ។
ភ្ញៀវទាំងអស់ពិតជារំភើបក្នុងការឃើញបុរសវ័យក្មេងដែលឈ្នះជ័យលាភីនោះ។ គាត់បានទទួលបណ្ណជាច្រើនតាមសំបុត្រប្រៃសណីយ៍និងការហៅទូរសព្ទពីភ្ញៀវ។ ភ្ញៀវគ្រប់រូបដែលបានមកជួបគាត់បានអបអរគាត់ចំពោះជោគជ័យរបស់គាត់។ វាពិតជាបានបង្ហាញថា រឿងផ្ទាល់ខ្លួនដែលអ្នកអាចគិតថាមិនសំខាន់ចំពោះភ្ញៀវរបស់អ្នក គឺពិតជាសំខាន់។ ពួកគេចង់ឮរឿងជោគជ័យនៃអ្វីកំពុងកើតឡើងជាបុគ្គលនៅការិយាល័យ។
ដោយ Jean M. Mathieu, CLU
ហេតុអ្វីអ្នកមិនអាចទាញប្រយោជន៍ពីពាក្យពេចន៍របស់ភ្ញៀវសម្រាប់អ្វីដែលពួកគេមានហើយ
ពេលខ្លះ អ្នកអាចសួរភ្ញៀវម្នាក់អំពីផែនការជំនួសចំណូលដែលពួកគេកំពុងមាន ហើយពួកគេនឹងប្រាប់អ្នកអំពីការរ៉ាប់រងដែលពួកគេមានស្រាប់។ អ្នកអាចទុករឿងនេះនៅមួយដុំ។ ប៉ុន្តែ Dana Mitchell, CFP, CLU បានស្វែងយល់ឃើញថា អ្នកមិនគួរធ្វើដូច្នេះទេ។
“ជាញឹកញាប់ មនុស្សទាំងឡាយមិនដឹងពីអ្វីជាក់លាក់ដែលពួកគេមានទេ ជាពិសេស បើវាត្រូវបានផ្ដល់ជូនដោយនិយោជក” នេះបើតាមសម្ដីរបស់សមាជិក MDRT បួនឆ្នាំ មកពី Toronto, Ontario, ប្រទេសកាណាដា ដែលបានបន្ថែមថា ពេលដំបូងដែលរឿងនេះបានបង្ហាញដល់នាង ប្រាក់បុព្វលាភហាក់ដូចជានៅឆ្ងាយពីថ្លៃចំណាយសម្រាប់ការរ៉ាប់រង។
តាមពិត នៅពេលផែនការនោះត្រូវបានចែករំលែកជាមួយនាង វាមិនមែនជាការការពារចំណូលផង; វាគឺជាកម្មវិធីមរណភាពនិងការបាត់បង់អវយវៈដោយសារគ្រោះថ្នាក់ ដែលនឹងពិបាកខ្លាំងក្នុងការទាមទារសំណង។ នាងបាននិយាយថា “នៅពេលខ្ញុំបានពន្យល់ពីផែនការនោះដល់ពួកគេ វាបង្ហាញថា ពួកគេនឹងមិនត្រូវបានរ៉ាប់រងឡើយ។ ខ្ញុំគិតថា រឿងនោះកើតឡើងលើសពីអ្វីដែលយើងអាចស្រមៃឃើញ។ នៅពេលនរណាម្នាក់និយាយថា ពួកគេត្រូវបានរ៉ាប់រង សូមមើលវាទៅ។”
“បើពួកគេត្រូវបានរ៉ាប់រង ពិតជាអស្ចារ្យណាស់។ ប៉ុន្តែជាធម្មតា ខ្ញុំគិតថា អ្នកនឹងឃើញចំនួនទឹកប្រាក់រ៉ាប់រងទាប, អត្ថន័យកាន់តែតឹងរឹង ឬក៏អាចជាផលិតផលមួយដែលពួកគេគិតថាជាអ្វីដែលអ្នកកំពុងសួរអំពីវា ប៉ុន្តែពិតណាស់គឺអ្វីផ្សេង។”
តើអ្នកអាចត្រាប់ដូចម្ដេចដើម្បីឲ្យមានតម្លៃដូចគ្នានឹងភ្ញៀវរបស់អ្នក
អ្នកសន្មតថា ភ្ញៀវរបស់អ្នកនឹងផ្ដល់អាទិភាពដល់គ្រួសាររបស់ពួកគេជាងការងាររបស់ពួកគេ។ Elizabeth Dipp Metzger, MSFS, CFP បាននិយាយថា វាគឺជារឿងល្អមួយ បើភ្ញៀវរបស់អ្នករំពឹងថា អ្នកនឹងធ្វើដូចគ្នា។
“មនុស្សស្ងើចសរសើរមនុស្សដែលមានទំនាក់ទំនងខ្លាំងពិតប្រាកដ” នេះបើតាមសម្ដីរបស់សមាជិក MDRT 7ឆ្នាំ មកពី El Paso, តិចសាស់។ “បើអ្នកកំពុងស្វែងរកអ្នកប្រឹក្សាម្នាក់ដែលឲ្យតម្លៃលើភាពទំនាក់ទំនង បុគ្គលនោះនឹងមានភាពទំនាក់ទំនងខ្លាំងជាមួយមនុស្សជុំវិញពួកគេដែរ។”
សម្រាប់ Metzger នោះមានន័យថា បើនាងមានព្រឹត្តិការណ៍ក្នុងគ្រួសារដ៏សំខាន់មួយដែលប្រឆាំងគ្នាជាមួយឱកាសការងារសក្ដានុពល គ្រួសារគឺសំខាន់ជាង។ អញ្ចឹង បើកូនរបស់នាងណាម្នាក់មានការប្រគុំតន្ដ្រីនាយប់ថ្ងៃព្រហស្បតិ៍ ហើយមានភ្ញៀវម្នាក់សុំជួបនៅពេលនោះដែរ នាងនឹងនិយាយយ៉ាងសាមញ្ញថា នាងមិនអាចជួបបានទេនៅយប់នោះ។ នាងបាននិយាយថា “បើមានភាពអាសន្ន ខ្ញុំសប្បាយរីករាយក្នុងការនិយាយតាមទូរសព្ទជាមួយភ្ញៀវនិងធ្វើការជាមួយពួកគេ។ ជានិច្ចកាល យើងធ្វើអ្វីគ្រប់យ៉ាងដែលយើងអាចធ្វើបាន មិនថាវានឹងកើតឡើងនាពេលព្រឹកព្រហាម ឬក៏ត្រូវធ្វើការដល់យប់ជ្រៅទេ។ ប៉ុន្តែ បើវាជាអ្វីមួយដែលគ្រួសាររបស់ខ្ញុំត្រូវការ នោះខ្ញុំនឹងប្រាប់ភ្ញៀវថា ខ្ញុំមិនទំនេរទេ។”
ថ្មីៗនេះ Metzger មានព្រឹត្តិការណ៍ការងារមួយនៅ Kentucky ដែលអាចឲ្យនាងស្ថិតនៅទីនោះសម្រាប់ Kentucky Derby ដែលជាការប្រកួតសេះប្រណាំងដ៏ធំបំផុតមួយ។ ប៉ុន្តែនាងមិននៅទីនោះទេ — នាងបានទៅផ្ទះដើម្បីទៅទស្សនាការប្រកួតបាល់ទះរបស់កូនស្រីនាង។
នាងបាននិយាយថា “គ្មានអ្វីគួរឲ្យឆ្ងល់ទេ។ នៅពេលកូនរបស់ខ្ញុំណាម្នាក់មានអ្វីមួយដែលសំខាន់ចំពោះពួកគេ បុគ្គលិកខ្ញុំដឹងថា យើងត្រូវប្ដូរកាលវិភាគ ដោយសាររឿងនោះវាសំខាន់ជាងអ្វីដែលកើតឡើងនៅកន្លែងធ្វើការ។ យើងកំពុងព្យាយាមជួយភ្ញៀវឲ្យអាចចំណាយពេលវេលាជាមួយអ្នកដែលពួកគេស្រឡាញ់ អញ្ចឹងហេតុអ្វីបានជាយើងមិនរស់នៅក្នុងជីវិតដូចនោះដែរ?”
